Ushtruesi i detyrës së Drejtorit të Përgjithshëm të RTK-së, Hysen Hundozi, ka njoftuar se punëtorët e transmetuesit publik kanë marrë pagat për muajt tetor dhe nëntor, pas ndarjes së mjeteve nga Qeveria e Republikës së Kosovës.
Sipas tij, kjo është mundësuar falë përpjekjeve intensive institucionale për të nxjerrë RTK-në nga situata e rënduar financiare, e shkaktuar nga mungesa e vendimmarrjes në Kuvendin e Kosovës.
“Kjo u mundësua falë përpjekjeve intensive institucionale për të nxjerrë RTK-në nga situata e rënduar financiare, e shkaktuar nga mungesa e vendimmarrjes në Kuvendin e Kosovës. E di që kjo periudhë ka qenë sfiduese për institucionin tonë, dhe dua t’i falënderoj të gjithë ata që, me besim, durim dhe përkushtim, kanë kontribuar në ruajtjen e funksionimit të RTK-së”, ka shkruar Hundozi.
Ai ka shtuar se gjatë këtij viti është punuar në rrethana të jashtëzakonshme, duke u përballur me sfida të rënda financiare, por puna ka vazhduar me avancime të dukshme në raportet me punëtorët, forcimin e ligjshmërisë dhe bashkëpunimin me partnerë vendorë e ndërkombëtarë.
Hundozi ka bërë të ditur se pas konstituimit të Kuvendit të ri, RTK do të angazhohet për të gjetur zgjidhje ligjore dhe të qëndrueshme për financimin, pronën dhe çështjet e tjera jetike për institucionin.
Ai ka theksuar se RTK ka një vizion të qartë për të ardhmen si transmetues publik dhe do të punojë me vendosmëri për realizimin e këtij vizioni.
