Përmbytje të menjëhershme dhe rrëshqitje të dheut në ishullin Sumatra të Indonezisë kanë lënë të vdekur 49 persona dhe 67 raportohen të zhdukur, ndërsa ekipet e shpëtimit të enjten po vazhdojnë kërkimet e trupave në lumenj dhe rrënojat e fshatrave.
Shirat monsune gjatë javës së kaluar bënë që lumenjtë të dilnin nga shtrati në provincën e Sumatrës Veriore të martën. Afër 5,000 banorë janë strehuar në strehimore e qeverisë.
Agjencia e Meteorologjisë, Klimatologjisë dhe Gjeofizikës e Indonezisë tha se u parashikuan më shumë rrebeshe për provincën e Sumatrës Veriore dhe rreziku i reshjeve ekstreme do të vazhdojë deri javën e ardhshme, shkruan AP.
Ai rekomandoi modifikimin e motit për të zvogëluar reshjet e shiut, dhe shefi i agjencisë së fatkeqësive natyrore, Suharyanto, tha se do të bëhet mbjellja e reve për të parandaluar reshje të mëtejshme të shiut dhe përmbytjeve.
“Ne do të vendosim teknologjinë e modifikimit të motit duke filluar nga nesër, në mënyrë që të mos bjerë shi gjatë kësaj periudhe reagimi ndaj emergjencave”, u tha Suharyanto, i cili njihet me një emër të vetëm si shumë indonezianë, gazetarëve përpara se të vizitonte zonat e goditura nga përmbytjet dhe rrëshqitjet e dheut në qytetin Sibolga të enjten.
