Kuvendi i Prishtinës po mban sot mbledhje të jashtëzakonshme për të diskutuar bartjen e mjeteve vetjake nga viti 2024 në vitin 2025, si dhe për miratimin e buxhetit për vitin 2026.
Kryeqyteti po përballet me një situatë të vështirë financiare, ndërsa autoritetet komunale kanë akuzuar Qeverinë në detyrë të drejtuar nga Albin Kurti për mos-alokimin e mjeteve vetanake.
Kryetari i Prishtinës, Përparim Rama, kërkoi publikisht alokimin e 35 milionë eurove, ku 25 milionë janë mjete vetanake dhe 10 milionë janë grante qeveritare, të cilat, sipas tij, nuk kërkojnë procedura të veçanta në Kuvend.
“Kërkoj publikisht që këto mjete të alokohen nga Ministria e Financave”, tha Rama.
Nga ana tjetër, shefi i grupit të LVV-së në Asamblenë e Prishtinës, Gëzim Sveçla, akuzoi Ramën për keqmenaxhim, duke thënë se mbledhja po përdoret për qëllime elektorale.
“Kjo mbledhje mund të ishte thirrur muaj më parë, por Rama e përdori këtë situatë për zgjedhjet lokale, ndërsa shefi i tij, Lumir Abdixhiku, do ta përdorë për zgjedhjet parlamentare”, tha Sveçla.
