Nënkryetari i Aleancës për Ardhmërinë e Kosovës, Ahmet Isufi, ka deklaruar se qeveria e ardhshme e Kosovës pritet të formohet nga partitë që aktualisht janë në opozitë.
Sipas tij, këto parti do të shënojnë rritje në zgjedhjet e 28 dhjetorit, si pasojë e, siç tha ai, ngecjeve të katër viteve të qeverisjes së Lëvizjes Vetëvendosje.
Në emisionin “Ditari” në Tëvë1, Isufi ka theksuar se partitë ish-opozitare do të kenë gatishmëri të bashkohen në një koalicion paszgjedhor për të krijuar një qeveri që e stabilizon vendin dhe rikthen raportet me partnerët ndërkombëtarë.
“Besoj se për krijimin e qeverisë së ardhshme do të ketë koalicion nga partitë e mëhershme opozitare, sepse është treguar se VV është e interesuar të krijojë qeveri vetëm, por në fakt nuk do të mund t’i ketë votat e mjaftueshme. Prandaj do t’i mbetet ish-opozitës ta bëjë qeverinë. Tani mbetet të shihet nga marrëveshjet se si mund të arrihen shifrat. Unë konsideroj se partitë opozitare do të kenë ngritje për shkak të të gjitha defekteve që kanë ndodhur, qoftë gjatë mandatit të kaluar katërvjeçar ku Kosova ka ngecur shumë në planin e brendshëm në të gjitha segmentet, por edhe në planin e jashtëm, me rrënimin e të gjitha raporteve me bashkësinë ndërkombëtare. Kosova nuk ka kohë për të humbur, prandaj, në momentin që do të përfundojnë zgjedhjet, do të ketë koalicion. Nuk kemi më arsye t’i themi popullit se do të shkojmë përsëri në zgjedhje, sepse do të ishte absurde. Përkundrazi, do të ketë gatishmëri për një qeveri që stabilizon gjendjen në vend dhe krijon raporte të reja me vendet e tjera”, ka deklaruar ai.
Isufi ka shtuar se Lëvizja Vetëvendosje nuk do të arrijë t’i sigurojë votat e nevojshme për të qeverisur e vetme pas zgjedhjeve të 28 dhjetorit, gjë që, sipas tij, e bën të pashmangshme krijimin e një qeverie të udhëhequr nga partitë që aktualisht janë në opozitë.
“VV nuk do t’i arrijë numrat për të qeverisur e vetme. Kjo do të thotë se qeveria e ardhshme do të udhëhiqet nga partitë ish-opozitare, për shkak të mosbesimit që është krijuar mes VV-së dhe partive të tjera e që është treguar me mënyrën se si ajo është sjellë jo vetëm gjatë mandatit të kaluar, por edhe pas daljes në vend të parë në zgjedhjet e 14 shkurtit u përdor një fjalor i ashpër ndaj opozitës. VV i konsideroi partitë e tjera jo si kundërshtarë politikë apo partnerë potencialë, por me një fjalor denigrues. Kjo krijoi rrethana mosbesimi që ekzistojnë edhe sot, sepse nuk ka një qasje pozitive ndaj partive opozitare”, ka përfunduar ai./teve1.info/
