Punëtorët e Trafikut Urban dhe të operatorëve privatë kanë vazhduar sot protestën e tyre, e cila ka hyrë në ditën e tretë. Shkak për këtë protestë është mosmarrja e pagave për disa muaj rresht.
Të martën, punëtorët u nisën me autobusë nga Komuna e Prishtinës drejt objektit të Qeverisë, për të shprehur pakënaqësitë e tyre. E njëjta metodë proteste pritet të vazhdojë edhe sot, por me një kohëzgjatje më të madhe.
Në dy ditët e para të protestës, punëtorëve iu bashkua edhe kryetari i Prishtinës, Përparim Rama. Ai akuzoi Qeverinë për bllokim të buxhetit dhe për “sabotazh” ndaj Komunës, duke theksuar se situata është bërë e paqëndrueshme për qindra punëtorë.
Ndërkohë, mungesa e transportit publik po krijon telashe të mëdha për qytetarët e Prishtinës. Shumë prej tyre janë detyruar të gjejnë forma alternative për të udhëtuar, ose të ecin në këmbë për të përmbushur detyrimet e përditshme.
Me protestën që po zgjatet dhe pa një zgjidhje në horizont, situata po rëndohet nga dita në ditë. Nuk ka ende një marrëveshje mes palëve, ndërsa punëtorët paralajmërojnë se do të vazhdojnë protestat deri në marrjen e pagave të tyre.
Përfaqësuesi i Trafikut Urban, Ilmi Gashi, sot para gazetarëve deklaroi se nuk kanë pasur takim me qeverinë në detyrë që nga dita e hënë.
Ndërkohë, paralajmëroi se protesta do të vazhdojë të mbahet deri në momentin që bëhet alokimi i mjeteve nga Komuna.
