Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit B.G., i cili dyshohet se ka kryer veprat penale “Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve”.
Sipas aktakuzës, më 17 tetor 2025, rreth orës 00:10, në banesën familjare në Prizren, në rrethana të konfliktit të çastit dhe, siç thuhet në aktakuzë, me motive xhelozie, B.G. dyshohet se ka sulmuar me thikë bashkëshorten e tij, M.A., duke e goditur gjashtë herë me një mjet të mprehtë me teh 13 cm.
Viktima ka pësuar lëndime të rënda, përfshirë dëmtime serioze të organeve të brendshme.
Në përpjekje për të ndërhyrë, edhe vajza e mitur e M.A.-së është goditur me thikë, duke pësuar lëndime të rënda në zonën e krahërorit dhe barkut.
Lëndimet e shkaktuara ndaj të dy viktimave janë konfirmuar në ekspertizën mjeko-ligjore të datës 24 nëntor 2025.
Prokurori i çështjes ka propozuar që, pas shqyrtimit gjyqësor dhe administrimit të provave, i pandehuri të shpallet fajtor për veprat për të cilat akuzohet dhe të dënohet sipas dispozitave ligjore.
Prizren – Burri ther me thikë gruan dhe vajzën e tij të mitur, të dyja në gjendje të rëndë
