Punëtorët e “Trafikut Urban”, pas protestës para Komunës së Prishtinës, janë ndaluar para objektit të Qeverisë së Kosovës.
Ata po kërkojnë zgjidhje për problemin e krijuar pas pezullimit të punës për shkak të krizës finaciare.
I pranishëm është edhe kryetari i Prishtinës, Përparim Rama.
Ai ka fajësuar Qeverinë e Kosovës për problemin e krijuar, ku edhe ka kërkuar takim urgjent me kryeministrin në detyrë, Albin Kurti dhe ministrin në detyrë të Financave, Hekuran Murati.
“Fondet tona të kryeqytetit kanë qenë dhe vazhdojnë të jenë të bllokuara. Dhe si rezultat e kemi pas të pamundur me i paguar edhe “Trafikun Urban” edhe sektorin privat. Problemi është te Ministria e Financave. Kërkoj takim urgjent me kryeministrin dhe ministrin që këtë situatë me zgjidh menjëherë, sepse mund të zgjidhet”, tha Rama para protestuesve, raporton teve1.info
Ai është i është përgjigjur edhe akuzave të ministrit në detyrë, Hekuran Murati, i cili tha se të premten janë flokuar mjetet nga Thesari i Prishtinës, por që komuna nuk i ka kryer pagesat.
“I kanë alokuar 3.2 milionë, ndërsa neve na i kanë borxh rrethe 35 milionë. Në orën 15:30 i kanë alokuar, ndërsa në 15:45 e kanë mbyllë mundësinë e pagesave. Kjo është loja për fat të keq e tyre”, tha Rama.
Ndërkaq, kryetari i Shoqatës së Transportit Publik/Privat, Izet Smajli, ka bërë thirrje për mbështetje nga qytetarët dhe institucionet përgjegjëse për situatën e rëndë me të cilën përballen punëtorët e këtij sektori.
Smajli ka deklaruar se punëtorët e transportit publik dhe privat kanë 6 muaj pa marrë pagat e tyre, duke theksuar se kjo situatë ka bërë që shumë familje të vuajnë pasiguri financiare.
“I lus qytetarët të na kuptojnë, por punëtorët tanë nuk kanë marrë paga për gjashtë muaj. Edhe ata që kanë paga, po kanë vështirësi të mbyllin muajin. Familjet kanë nevojë për paga dhe punëtorët kanë nevojë për mbështetje. Nuk ia kemi borxh as Komunës dhe as askujt tjetër që të arrijmë në këtë gjendje. Ne kërkojmë që mjetet tona kudo që janë, të vijën në shërbimin që kemi ofruar”, tha Smajli në një deklaratë për mediat.
Smajli shtoi se protesta e sotme është një mënyrë për të shprehur pakënaqësinë e punëtorëve dhe kërkoi përkrahje nga shoqëria dhe institucionet përgjegjëse për zgjidhjen e këtij problemi të vazhdueshëm.
Shoqata e transportit publik-privat protestë para Komunës së Prishtinës
