Publicisti Kim Mehmeti ka komentuar debatet politike rreth vendimit të presidentes Vjosa Osmani për caktimin e 28 dhjetorit si datë të zgjedhjeve, vendim i cili nga partitë opozitare u interpretua si “mbajtje zhagu ndaj Vetëvendosjes”.
Por sipas Mehmetit, këto akuza nuk qëndrojnë dhe vendimi i presidentes është më shumë në funksion të interesit shtetëror sesa politik.
“Nëse unë do të kisha qenë president, do ta zgjidhja datën, ku më shumë kosovarë do të mund të votonin, pra edhe mërgimtarët të ishin këtu. Pra, logjikisht ajo datë është 28. Shpesh herë, nuk është puna se si luan tjetri, por as ti i lejon që ta bëjë atë lojë dhe këta ia lejuan që ta bëj edhe këtë kalkulim që ta zëmë se e ka bërë për ta ndihmuar VV-në. Por, kjo është në kuadër të asaj që nuk dëmtohet interesi i shtetit”, tha ai në emisionin “Këndi i Kimit” në Tëvë1.
Më tej, Mehmeti theksoi se është krejtësisht e arsyeshme të besohet se presidentja ka pasur për synim rritjen e pjesëmarrjes së qytetarëve, veçanërisht të mërgatës, e cila zakonisht kthehet në fundvit.
“Përkundrazi, ka bazë të besohet në atë që presidentja ndoshta e ka pasur parasysh atë që të votojnë sa më shumë kosovarë. Ai është interesi i Kosovës. Partitë opozitare donin që të votojnë sa më pak kosovarë, pra duke kërkuar që zgjedhjet të mbahen më 21 dhjetor”, deklaroi ai.
Opozita e ka akuzuar presidenten se ka vepruar në linjë me partinë në pushtet, por Mehmeti vlerëson se interesi i zgjedhjeve me pjesëmarrje të lartë është interes i Kosovës, jo i ndonjë subjekti politik. /teve1.info/
