SBAShK ka dorëzuar një kallëzim penal në Prokurorinë Themelore të Prishtinës kundër ministrit në detyrë të Financave, Hekuran Murati.
Sipas sindikatës, kallëzimi është dorëzuar për shkak të dyshimit se Murati ka keqpërdorur detyrën zyrtare duke mos zbatuar Ligjin për Këshillin Ekonomik Social.
SBAShK pretendon se ministri nuk e ka shpallur që nga fundi i vitit 2022 thirrjen për konstituimin e këtij Këshilli, ndonëse një gjë e tillë është obligim ligjor.
Në njoftimin e sindikatës thuhet se mosveprimi i Muratit ka shkaktuar dëm për sindikatat dhe anëtarët e tyre në gjithë vendin, duke penguar diskutimin për ligje dhe rregullore që prekin të gjithë punëtorët në Kosovë.
Sipas SBAShK-ut, mungesa e funksionimit të Këshillit Ekonomik Social ka bërë që Kosova të mbetet pa Marrëveshje Kolektive, e cila është e garantuar me Ligjin e Punës, duke e lënë vendin si të vetmin në rajon pa një marrëveshje të tillë të nënshkruar.
“Me këtë mosveprim, Murati ka shkaktuar dëme të palës së tretë, pra sindikatave dhe anëtarëve të sindikatave në tërë Kosovën duke pamundësuar diskutimin për Ligjet dhe rregulloret që prekin gjithë të punësuarit në Kosovë e me theks të veçantë duke e lënë Kosovën pa Marrëveshjen Kolektive si e drejtë që buron nga Ligji i punës dhe kështu Kosova mbetet si i vetmi shtet në rajon që nuk ka këtë Marrëveshje të nënshkruar”, thuhet në njoftim për media të Sindikatës së Arsimit”, thuhet në njoftim. /teve1.info/
