Pas reshjeve me intensitet të lartë që kanë përfshirë vendin gjatë ditëve të fundit, disa komuna të Kosovës janë përballur me vërshime të mëdha dhe dëme materiale.
Ndër zonat më të prekura ka qenë Gjilani, ku u raportuan disa raste emergjente.
Policia e Kosovës ka bërë të ditur se më 18 nëntor zyrtarët policorë kanë intervenuar me kohë në shpëtimin e dy personave të moshuar, shtëpia e të cilëve ishte përmbytur nga uji.
“Me datën 18.11.2025, pas vërshimeve të shkaktuara nga reshjet e dendura të shiut në qytetin e Gjilanit, njësitet patrulluese të Stacionit Policor në Gjilan kanë reaguar menjëherë dhe me shumë përkushtim. Gjatë intervenimit, zyrtarët policorë kanë arritur të shpëtojnë dy persona të moshuar, shtëpia e të cilëve ishte përmbytur nga uji. Reagimi i shpejtë dhe profesional i zyrtarëve policorë kanë bërë që të shmangen pasoja të rënda dhe të mbrohen dy jetë njerëzish. Drejtoria Rajonale e Policisë në Gjilan qëndron pranë qytetarëve në çdo situatë me përkushtim në mbrojtje të jetës e pasurisë së secilit qytetar dhe reagim me kujdes e përgjegjësi sa herë që kërkohet”, thuhet në njoftim.
Në faqen zyrtare të Policisë së Kosovës në Facebook është publikuar edhe videoja e operacionit të shpëtimit, ku shihen zyrtarët duke ndihmuar të moshuarit të largohen nga ndërtesa e përmbytur.
