Kryetari i Lidhjes Demokratike të Kosovës (LDK), Lumir Abdixhiku, ka pritur në një takim njoftues ambasadorin e ri jorezident të Mbretërisë së Norvegjisë në Kosovë, Arne Sannes Bjørnstad.
Abdixhiku e uroi diplomatin norvegjez për marrjen e detyrës së re dhe i dëshiroi sukses në misionin e tij, duke theksuar rëndësinë e marrëdhënieve të mira dypalëshe.
Ai vlerësoi mbështetjen e vazhdueshme që Norvegjia i ka dhënë Kosovës ndër vite, si në proceset politike e zhvillimore, ashtu edhe në arenën ndërkombëtare.
Gjatë takimit, dyshja diskutoi për zhvillimet e fundit politike në vend dhe për qëndrimet e LDK-së mbi çështjet aktuale.
Po ashtu, u trajtuan mundësitë për forcimin e partneritetit ndërmjet Kosovës dhe Norvegjisë, me theks në fusha të interesit të përbashkët dhe projekte që mund të kontribuojnë në zhvillimin e mëtejshëm të vendit.
Në fund, të dy palët shprehën gatishmërinë për vazhdimin e komunikimit dhe bashkëpunimit në periudhën në vijim.
