Kryetari i Komunës së Prishtinës, Përparim Rama, i ka dërguar një kërkesë urgjente kryeministrit në detyrë, duke kërkuar ndërhyrjen e tij për zgjidhjen e, siç e quan ai, bllokadës në ndarjet buxhetore për vitin 2025.
Rama ka deklaruar se ministri në detyrë i Financave nuk ka kthyer përgjigje ndaj kërkesave të shumta paraprake të komunës, duke e lënë situatën në një pikë të papranueshme.
“Ministri në detyrë i Financave nuk u është përgjigjur shumë kërkesave paraprake, andaj ndërhyrja juaj është bërë e pashmangshme,” ka shkruar Rama në kërkesën e tij.
Ai theksoi se mosveprimi i institucionit përgjegjës ka krijuar një bllokadë serioze që tashmë po rrezikon funksionimin normal të shërbimeve publike në kryeqytet.
“Mungesa e përgjigjes dhe veprimeve ka krijuar bllokadë që po rrezikon funksionimin e shërbimeve publike në Prishtinë,” ka paralajmëruar Rama.
Kreu i Prishtinës ka paraqitur dy kërkesa konkrete drejtuar kryeministrit në detyrë:
Alokimin e plotë të hyrave vetanake të Komunës së Prishtinës, dhe
Zbatimin e vlerave të miratuara për ndarjen buxhetore 2025.
Rama ka theksuar se qytetarët nuk duhet të mbahen peng i situatave politike dhe se institucionet duhet të veprojnë urgjentisht.
“Është e papranueshme që qytetarët të bëhen peng i dinamikave politike. Përgjegjshmëria institucionale kërkon veprim të menjëhershëm,” ka shkruar ai.
