Shtetet e Bashkuara do t’u shesin aeroplanë ushtarak F-35 Arabisë Saudite, ka bërë të ditur presidenti amerikan, Donald Trump, para takimit në Shtëpinë e Bardhë me princin saudit të kurorës, Mohammed bin Salman.
“Ne do ta bëjmë këtë. Ne do t’u shesim aeroplanë F-35. Ata kanë qenë aleat të shkëlqyeshëm,” ka thënë Trump.
Dy liderët pritet të diskutojnë marrëveshje mbi mbrojtjen dhe energjinë bërthamore civile gjatë vizitës së të martës në Shtëpinë e Bardhë, shkruan BBC.
Vizita e fundit e princit ishte gjatë mandatit të parë të Trumpit në 2018.
Trump dhe princi i kurorës u takuan në Riad në maj. Atje, SHBA-të ranë dakord t’i shesin Arabisë Saudite armë me vlerë gati 142 miliardë dollarë (107 miliardë paund) në atë që Shtëpia e Bardhë e përshkroi si “marrëveshja më e madhe e shitjes së mbrojtjes në histori”, si pjesë e një marrëveshjeje investimi prej 600 miliardë dollarësh.
Arabia Saudite është blerësi më i madh i armëve amerikane.
Një avion luftarak F-35A kushton mesatarisht 82.5 milionë dollarë, sipas prodhuesit kryesor Lockheed Martin.
Gjatë takimit të së martës, Trump pritet gjithashtu të shtyjë Arabinë Saudite që të nënshkruajë Marrëveshjet e Abrahamit që ai krijoi dhe të normalizojë marrëdhëniet me Izraelin.
Sauditët kanë thënë se kjo është e kushtëzuar nga një rrugë drejt një shteti palestinez – të cilën qeveria aktuale izraelite e refuzon.
