Fraksionet e rezistencës palestinezë kanë paralajmëruar se drafti i rezolutës së Shteteve të Bashkuara për të vendosur një forcë ndërkombëtare në Gaza është një përpjekje për të imponuar kujdestari të huaj në territorin palestinez.
Në një deklaratë të përbashkët, fraksionet thanë se mandati i propozuar do të hapte rrugën për “dominim të jashtëm mbi vendimin kombëtar palestinez”.
Sipas tyre kjo do të dërgonte në marrjen e të drejtave të palestinezëve për të vendosur dhe qeverisur punët e tyre.
Grupet theksuan se çdo përpjekje humanitare duhet të menaxhohet përmes “institucioneve kompetente palestineze” nën mbikëqyrjen e OKB-së, bazuar në respektin për sovranitetin palestinez dhe nevojat e popullsisë, dhe të lirë nga përpjekjet për të përdorur ndihmën si një mjet politik ose sigurie për të riformësuar realitetin e brendshëm të Gazës.
Fraksionet poashtu hodhën poshtë çdo përpjejke për çarmatim apo ndalim të përpjekjes legjitime ndërkombëtare të popullit palestinez për t’i rezistuar pushtuesit izraelit.
Grupet thanë se çdo mision ndërkombëtar, nëse krijohet, duhet të bjerë plotësisht nën autoritetin e OKB-së, të koordinohet ekskluzivisht me institucionet zyrtare palestineze dhe të kufizojë detyrat e tij në mbrojtjen e civilëve, sigurimin e shpërndarjes së ndihmës dhe ndarjen e forcave – pa u bërë një autoritet sigurie ose administratë mbikombëtare.
Ata gjithashtu hodhën poshtë çdo formë të pranisë ushtarake të huaj, kujdestarisë ose bazave ndërkombëtare brenda Gazës, duke i quajtur masa të tilla një sulm të drejtpërdrejtë ndaj sovranitetit palestinez, ka cituar Anadolu.
Ata bënë thirrje për mekanizma ndërkombëtarë që ta mbajnë Izraelin përgjegjës për shkeljet e tij të vazhdueshme, duke përfshirë përgjegjësinë për sigurinë civile dhe përkeqësimin e krizës humanitare që rezulton nga kontrolli i Izraelit mbi kalimet kufitare të Gazës.
Deklarata arriti në përfundimin se një kornizë arabo-islamike për administrimin e Gazës është modeli më i pranueshëm dhe se çdo marrëveshje e ardhshme duhet të bazohet në “vullnetin e lirë palestinez” dhe unitetin e tokës, popullit dhe kauzës.
Korniza arabo-islamike parashikon që Hamasi t’ia dorëzojë administrimin e Gazës një komiteti administrativ palestinez të përkohshëm të teknokratëve të pavarur.
