Pep Guardiola po konsideron mundësinë të largohet nga posti i trajnerit të Manchester Cityt në fund të sezonit 2025/26, sipas The Times, që citon burime të afërta me klubin.
Trajneri katalanas 54-vjeçar ende nuk ka marrë një vendim përfundimtar në lidhje me të ardhmen e tij.
Kontrata e tij me klubin është e vlefshme deri në fund të sezonit 2026/27 dhe Pep gjithmonë ka respektuar marrëveshjet e tij, por persona të afërt me situatën besojnë se largimi i tij verën e ardhshme, kur do të ketë përmbushur dhjetë vite në krye të Cityt, është një mundësi reale.
Mendohet se vera e vitit 2026 do të ishte koha e duhur për largimin e Guardiolës. Skuadra e rinovuar tashmë është stabilizuar, trajneri ka fituar të gjitha trofetë e mundshëm dhe dhjetë vjet në një klub janë shumë, veçanërisht për dikë që, para ardhjes në Angli, nuk kishte qëndruar më shumë se katër vite në një ekip të vetëm.
Megjithatë, të njëjtët persona kishin parashikuar edhe më parë largimin e tij, por në fund Guardiola zgjodhi të rinovonte kontratën.
Duhet theksuar se ende nuk është shpallur vendimi për çështjen që përfshin 115 akuzat për shkelje financiare ndaj Manchester Cityt, ndonëse klubi ka mohuar vazhdimisht çdo fajësi dhe ka deklaruar se disponon “një sërë provash të pakundërshtueshme” që do të ndihmojnë në shfajësimin e tij.
Në vitin 2023, Guardiola kishte deklaruar se do ta drejtonte Cityn edhe nëse klubi do të binte në Championship.
Kjo nuk është hera e parë që e ardhmja e Guardiolës vihet në pikëpyetje. Personi që e ka bindur atë të qëndrojë çdo herë ka qenë Khaldoon Al Mubarak, marrëdhënia mes trajnerit dhe presidentit të klubit është shumë e mirë.
Mendohet se dështimi i sezonit të kaluar ka ndikuar ndjeshëm te Guardiola, si në aspektin profesional ashtu edhe në atë personal.
