Diplomati amerikan Christopher Hill, i njohur për rolin e tij në negociatat e paqes për Kosovën në fund të viteve ’90, ka dëshmuar për tre ditë me radhë në Dhomat e Specializuara në Hagë, në procesin gjyqësor ndaj ish-presidentit të Kosovës, Hashim Thaçi, i akuzuar për krime lufte dhe krime kundër njerëzimit.
Në dëshminë e tij, Hill u ndal gjerësisht në rolin e Thaçit gjatë kohës së Ushtrisë Çlirimtare të Kosovës (UÇK) dhe në konferencën e Rambujesë, duke theksuar se përshtypja e tij ishte që Thaçi nuk ishte një figurë kryesore vendimmarrëse brenda UÇK-së.
Ai po ashtu shtoi se, sipas vlerësimit të tij, UÇK-ja nuk kishte një strukturë të qartë hierarkike, megjithëse përpiqej t’i paraqitej komunitetit ndërkombëtar, veçanërisht Shteteve të Bashkuara, si një organizatë e organizuar ushtarakisht dhe politikisht.
I pyetur nga gjykatësit për takimet e tij me Sllobodan Millosheviqin, Hill tha se ish-presidenti serb ishte i shqetësuar që SHBA-ja po afrohej me UÇK-në, ndërsa, sipas tij, nënshkrimi i marrëveshjes së Rambujesë nga delegacioni shqiptar i rrëzoi pretendimet e Millosheviqit se shqiptarët nuk mund të bashkoheshin rreth një platforme të përbashkët politike.
Hill gjithashtu sqaroi se nuk kishte informacione që Thaçi të ketë qenë i përfshirë në ndonjë aktivitet të paligjshëm apo në shkelje të të drejtave të njeriut gjatë luftës.
Ai theksoi se nuk e konsideronte Thaçin si një nga themeluesit e UÇK-së dhe se nuk kishte njohuri të qarta se kush i lëshonte komunikatat e organizatës në atë kohë.
Me përfundimin e ditës së tretë të dëshmisë, përmbyllet paraqitja e Christopher Hill në këtë proces gjyqësor, ku ai dha një pasqyrë të rolit të SHBA-së në negociatat e paqes dhe të perceptimeve të tij për strukturën dhe funksionimin e UÇK-së në periudhën e luftës. /teve1.info/
