Anëtari i Komisionit Qendror të Zgjedhjeve nga radhët e PDK-së, Ilir Gashi, ka deklaruar se e vetmja mënyrë për të rikthyer integritetin e procesit zgjedhor dhe besimin e qytetarëve është që Mitrovica të shkojë përsëri në zgjedhje.
“Në sot mendojmë që ky proces duhet të bie edhe në duart e organeve të drejtësisë për faktin se nga këtu kemi vënë re se kemi defekt serioz të fletëvotimeve të cilat e kanë rrënuar besimin e opinionit publik të procesit zgjedhor. Konsiderojmë që e vetmja mënyrë për të rikthyer procesin në binar dhe rikthimin e besimit të qytetarëve në procesin zgjedhor dhe për t’i dhënë integritet dhe besueshmëri është rikthimi edhe njëherë te qytetari, që nënkupton rivotim të ri, shkuarja prapë në zgjedhje në këtë komunë”, tha Gashi.
Ai theksoi se procesi aktual është i rrënuar plotësisht.
“Duhej të rikthehej prapë. Nuk është çështja e numrave apo sa fletëvotime janë, është çështja e problemit i cili ka zbehur vullnetin e qytetarëve. Është një rëndim i integritetit të procesit zgjedhor. Unë s’po flas në emër të prokurorisë dhe organeve të cilat do të dalin me qëndrimet e tyre. Po flas si anëtar i KQZ-së që e ka parë si ka shkuar gjithë procesi”, shtoi ai.
Gashi gjithashtu nënvizoi se në shumë vendvotime në Mitrovicën e Jugut ka pasur defekte të cilat bien ndesh me rregulloren e KQZ-së.
“Është pak e rëndësishme se çka themi ne, për faktin se më e rëndësishme është se çka mendojnë qytetarët jashtë kësaj salle. Opinion publik mendon që është i dëmtuar. Pothuajse në shumë vendvotime ka defekte të tilla që bien ndesh me rregulloren e KQZ-së. Për rrjedhojë, ne do të bëjmë një analizë përmes një komisioni hetimor. PDK ka bërë një ankesë në PZAP për të ndjekur të gjitha rrugët ligjore në mënyrë që të rikthejë atë çka është e vërteta dhe besueshmërinë e qytetarëve”, tha Gashi.
Ai shtoi se edhe një votë e qytetarëve e keqpërdorur duhet të rivendosë besimin te procesi zgjedhor:
“Do të duhej që të rikthehet prapë. Nuk është çështje e numrave, është çështja e problemit i cili ka zbehur vullnetin e qytetarëve. Nuk po flas në emër të prokurorisë apo organeve të drejtësisë, po flas si anëtar i KQZ-së”, përfundoi ai.
