Një aksident trafiku ka ndodhur të mërkurën në fshatin Dobërdelan të Suharekës, ku një 58-vjeçar ka humbur jetën, ndërsa bashkëshortja e tij ka mbetur rëndë e lënduar.
Sipas njoftimit të Policisë së Kosovës, në aksident janë përfshirë një automjet dhe një kamion.
Shoferi i automjetit ka ndërruar jetë në vendngjarje, ndërsa gruaja e tij, që ishte pasagjere, është dërguar me urgjencë në Spitalin Rajonal të Prizrenit, ku po trajtohet në gjendje të rëndë.
“Menjëherë pas raportimit të rastit, njësitet policore kanë dalë në vendin e ngjarjes, kanë siguruar perimetrin dhe kanë nisur hetimet për të sqaruar rrethanat që kanë çuar deri te aksidenti”, thuhet në njoftimin e Policisë.
Autoritetet po hetojnë shkaqet e sakta të ngjarjes, ndërsa Policia e Kosovës ka bërë apel që shoferët të respektojnë rregullat e komunikacionit, në mënyrë që të parandalohet humbja e jetëve në trafik. /teve1.info/
