Qendra Komunale e Numërimit në Mitrovicë vazhdon të mbetet e mbyllur pas ngritjes së dyshimeve për manipulime me fletëvotimet gjatë rinumërimit të votave.
Kryesuesi i Qendrës Komunale të Votimit nga PDK, Jahir Sumiqi, ka deklaruar se procesi u ndërpre për shkak të dyshimeve serioze për manipulime.
“Në orën 19 me urdhërin e prokurorisë është ndërprerë rinumërimi i votave. Ajo çfarë është prej mëngjesit nga ora 10 parë janë dyshimet tona të bazuara dhe faktuara, që janë grumbulluar dhe janë shpërfaqur në media dhe organet kompetente. Ne që kemi qenë në ndërimin e pasdites dhe pse ka pasur nga mëngjesi dyshime për manipulime të votës, e kemi ndërprerë dhe e kemi bojkotuar dhe e kemi thirrur policinë dhe është ndërprerë procesi”, ka thënë Sumiqi.
Ai ka shtuar se ato që janë gjetur brenda kutive ngrejnë dyshime për devijim të votës dhe shkelje të vullnetit qytetar në Mitrovicë.
Autoritetet po vazhdojnë hetimet për të sqaruar të gjitha rrethanat dhe për të siguruar që rezultati përfundimtar i zgjedhjeve reflekton vullnetin e qytetarëve.
