Kryetari i komunës së Skenderajt, Fadil Nura, ka kërkuar nga lideri i Partisë Demokratike të Kosovës (PDK), Memli Krasniqi, që të ndërmarrë masa ndaj dy përfaqësuesve të kësaj partie në Komisionin Qendror të Zgjedhjeve (KQZ).
Ai ka akuzuar ata se nuk kanë reaguar ndaj, siç thotë, sulmeve të përfaqësuesve të Lëvizjes Vetëvendosje dhe nuk e kanë mbrojtur dinjitetin e partisë.
Në një reagim të publikuar në Facebook, Nura ka thënë se përfaqësuesit e PDK-së në KQZ duhet të jenë zëri i partisë dhe të mbrojnë qëndrimet e saj në institucionet shtetërore.
“Sjellja e dy përfaqësuesve aktualë të Partisë Demokratike të Kosovës në KQZ ka qenë për keqardhje dhe në kundërshtim me interesat e partisë. Në vend që të reagojnë ndaj fyerjeve e sulmeve të përfaqësuesve të Vetëvendosjes në mbledhjet e KQZ-së, ata kanë dështuar të mbrojnë dinjitetin dhe qëndrimet politike të PDK-së. Kjo dëmton imazhin dhe besueshmërinë e partisë në një institucion kaq të rëndësishëm”, ka shkruar Nura.
Ai ka kërkuar nga Memli Krasniqi që të lirojë nga detyra dy anëtarët aktualë të PDK-së në KQZ – Ilir Gashin dhe Arianit Elshanin – dhe t’i zëvendësojë me përfaqësues të tjerë “me integritet profesional e politik”. /teve1.info/
