Edhe pse pritej që stërvitjen e parë të grumbullimit të këtij muaji, ta mbante në Kampin Nacional në Hajvali, futbollistët e Kosovës një gjë të tillë e kanë bërë në stadiumin “Fadil Vokrri”.
Në fakt, ky ndryshim është bërë në momentet e fundit për shkak të reshurave të shiut, të cilat thuhet se kanë pamundësuar stërvitjen e Kosovës në fushën e FFK-së, në Hajvali.
Në programin e Kombëtares së Kosovës të publikuar në faqen zyrtare të FFK-së, ishte paralajmëruar që stërvitja e parë të mbahej prej orës 17:00 në Hajvali por ashtu nuk ndodhi.
Përkundër ndryshimit të destinacionit, FFK-ja nuk njoftoi se stërvitjen e parë do ta mbajë në stadiumin “Fadil Vokrri” në kryeqytet.
Sot, në mesditë, selektori Franco Foda ka mbajtur konferencën e parë për shtyp për grumbullimin e nëntorit, ku ka folur për pritjet që i ka për ndeshjet me Slloveninë e Zvicrën.
Kosova, të shtunën luan në Lubjanë kundër Sllovenisë kurse tri ditë më vonë, e pret Zvicrën në Prishtinë.
Në të vërtetë, këto janë dy ndeshjet e fundit të ciklit kualifikues për Botërorin 2026.
