Kryetari i sapozgjedhur i Mitrovicës së Jugut ka theksuar se fitorja e tij është e qytetarëve të kësaj komune të cilët sipas tij, nuk janë lodhur së kërkuari dinjitet, drejtësi dhe qeverisje të ndershme.
Përmes një postimi në Facebook, Peci ka shprehur angazhimin e tij për të punuar me përulësi, vendosmëri, përgjegjësi dhe integritet kundër krimit dhe korrupsionit, duke siguruar transparencë dhe llogaridhënie në çdo vendim, si dhe duke respektuar çdo lagje, fshat dhe familje të Mitrovicës.
“Faleminderit për besimin dhe mbështetjen, për durimin dhe punën e palodhshme, për angazhimin, për çdo derë të hapur, për çdo takim, për çdo fjalë mbështetjeje. Kjo fitore është e juaja, është e Mitrovicës dhe e gjithë qytetarëve të saj që nuk janë lodhur së kërkuari dinjitet, drejtësi dhe qeverisje të ndershme. Jam thellësisht i gëzuar dhe i nderuar, por mbi të gjitha i vetëdijshëm për përgjegjësinë që po marr para jush, duke ju siguruar se asnjë ditë e këtij mandati nuk do të na shkojë dëm. Do të punoj me përulësi para qytetarëve të mi, me vendosmëri, përgjegjësi e integritet kundër krimit e korrupsionit, me transparencë e llogaridhënie në çdo vendim, me respekt e mirënjohje për çdo lagje, çdo fshat e çdo familje të Mitrovicës. Dua të falënderoj nga zemra strukturat, anëtarët dhe aktivistët e Lëvizjes VETËVENDOSJE! dhe Partisë Guxo; vullnetarët, kandidatët, shtabin, të rinjtë dhe të rejat dhe të gjithë bashkëpunëtorët tanë që nuk u ndalën asnjë ditë. Pa ju, pa punën tuaj të palodhur, kjo fitore nuk do të ishte e mundur”, ka shkruar ai në Facebook.
Peci ka shtuar se, nga sot, buxheti i komunës do të kthehet në projekte konkrete për infrastrukturën, arsimin, shërbime cilësore dhe hapësira të denja për jetën e përditshme.
“Nga sot, Mitrovica do të ketë qeverisje që dëgjon, që reagon dhe që mban fjalën. Buxheti i komunës do të kthehet në projekte konkrete, në infrastrukturë, arsim, shërbime cilësore dhe hapësira të denja për jetën e përditshme. Të rinjtë tanë duhet ta shohin të ardhmen e tyre këtu, në Mitrovicë. Para jush zotohëm se:
• Do të jem Kryetar i të gjithëve, pa dallim partie, bindjeje apo përkatësie;
• Interesi publik do të jetë gjithmonë mbi çdo interes tjetër;
• Mitrovica do të trajtohet me dinjitetin që meriton, si qytet i sakrificës, punës dhe guximit”, ka shtuar ai.
Po ashtu, Peci ka falënderuar kryeministrin në detyrë, Albin Kurti, për mbështetjen dhe besimin gjatë gjithë rrugëtimit.
“Shembull i njeriut të drejtë e trim, i ndershëm e sypatrembur, që i doli zot Mitrovicës dhe Republikës, nuk u tërhoq përballë kërcënimeve, shantazhit e presioneve të padrejta, goditi në rrënjë kontrabandën, krimin, strukturat paralele dhe të gjitha padrejtësitë e grumbulluara me vite, duke i kthyer qytetarëve besimin, sigurinë dhe dinjitetin, e Mitrovicës madhështinë e krenarinë”, ka theksuar Peci.
