Ministri në detyrë i Punëve të Brendshme, Xhelal Sveçla, ka reaguar në Facebook në lidhje me rezultatet e zgjedhjeve lokale, duke vlerësuar se Lëvizja Vetëvendosje ka arritur rezultate më të mira se në zgjedhjet e kaluara, edhe pse thotë se pritshmëritë e partisë ishin më të mëdha.
“Lëvizja Vetëvendosje në këto zgjedhje doli shumë më mirë se të gjitha herat në zgjedhje lokale, por pritshmëritë tona ishin më të mëdha,” ka shkruar Sveçla në reagimin e tij.
Ai ka kritikuar koalicionin LDK-PDK-AAK për ndikimin që ka pasur në rezultatet e zgjedhjeve, duke theksuar se qytetari i Prishtinës ka humbur më shumë se çdo kush tjetër.
“Është e qartë se në Prishtinë askush nuk është fituesi, ndërsa humbësi më i madh është qytetari i saj. Lëvizja Vetëvendosje humbi jo nga shpalosja apo bashkimi i ideve, por nga koalicioni i pazareve të llojeve e niveleve të ndryshme. Koalicioni LDK-PDK-AAK, oligarkë dhe disa kuazimedia do ti kushtojë më së shumti qytetarit,” ka shtuar Sveçla.
Gjithashtu, ai ka komentuar një incident të fotografuar nga një qytetar, i cili mbante një logo të LDK-së pranë shkollës “Faik Konica” në Prishtinë. Sveçla e ka cilësuar këtë si një formë viktimizimi dhe ka ritheksuar angazhimin e tij për të luftuar padrejtësitë dhe shkeljet.
“Janë disa që edhe kur bëjnë shkelje, luajnë viktimën. Ata që më njohin e dijnë shumë mirë se, edhe kur kam qenë Drejtor i Inspeksionit, edhe si Deputet e tani Ministër, gjithmonë kam reaguar ndaj shkeljeve e padrejtësive. Kështu do të vazhdoj, drejt dhe me shumë punë,” ka shkruar ai në Facebook.
Sveçla ka përmendur se do të vazhdojë angazhimin e tij për drejtësi dhe për të kundërshtuar çdo formë të abuzimit me pushtetin.
