Kancelari gjerman Olaf Scholz zbriti në Aeroportin e Prishtinës për të nisur vizitën zyrtare në vendet e Ballkanit Perëndimor.
Për këtë, homologu i tij kosovar, Albin Kurti doli për ta pritur me ceremoni të larta shtetërore.
Ndonëse moti ishte me shi, liderëve nuk u ngutej.
Pas kësaj Kurti e Scholz së bashku me delegacionet e tyre filluan takimin.
Detajet nga takimi, i tregoi në konferencë për media kryeministri i vendit, Albin Kurti.
Kurti tutje tha se ka marrë përkrahje nga Gjermania edhe për çështje të tjera si liberalizimi i vizave.
Por, kur të gjithë prisnin që kancelari gjerman Olaf Scholz të fliste në lidhje me këto tema, ai kishte probleme me mikrofonin.
Pasi ky problem u tejkalua, kancelari filloi ta jap mesazhet e tij të prera. Madje një të tillë e kishte edhe për normalizimin e raporteve mes Kosovës dhe Serbisë.
“Një marrëveshje politike mes dy vendeve është një kusht i rëndësishëm edhe për perspektivën e të rinjve në Kosovë. Marrëveshja në fund duhet të zgjidhë edhe çështjen e njohjes së Kosovës, sepse është e paimagjinueshme që dy vende që nuk e njohin njëra-tjetrën të bëhen pjesë e BE-së. Të dyja palët duhet t’i qasen njëra tjetrës”, tha Scholz.
Për nismën rajonale “Open Ballkan”, Scholz tha se Gjermania e përkrah tregun e përbashkët rajonal. Por, pavarësisht kësaj ai premtoi rifunksionalizim të Procesit të Berlinit, i cili ka për synim përshpejtimin e anëtarësimit të Ballkanit në BE.
“Dëshiroj që së bashku me partnerët tanë, në kuadër të Procesit të Berlinit ta rijetësoj atë këtë vit dhe në vjeshtë do të thërras një konferencë në Berlin. Rajoni duhet të përparojë referuar krijimit të një tregu të përbashkët rajonal dhe katër marrëveshjet e rëndësishme për lëvizjen e lirë, të njerëzve, për njohjen e diplomave profesionale duhet të lidhen shpejt”, shtoi Scholz.
Udhëheqësi gjerman, i premtoi qytetarëve të Kosovës se është duke punuar me vendet skeptike, për t’i bindur për liberalizimin e vizave.
“Ne angazhohemi që liberalizimi i vizave të vijë sa më shpejt, pasi kushtet janë plotësuar dhe për këtë flasim me partnerët tanë që edhe ata të binden siç jemi bindur ne”, tha tutje kancelari gjerman.
Nga Kosova Scholz do të udhëtoi për në Serbi, shtet ky për të cilin ai tha se duhet të vendos sanksione ndaj Rusisë, ashtu siç kanë bërë të gjitha vendet demokratike.
Raporti i gazetarit Valmir Gallopeni.
