Ministri në detyrë i Punëve të Brendshme, Xhelal Sveçla, ka njoftuar se ka inspektuar pjesën e kufirit shtetëror ku dyshohet se është rrëmbyer shtetasi i Kosovës, Milan Vukashinoviq.
Sipas tij, në bazë të informatave dhe dëshmive të siguruara nga autoritetet vendore, tashmë është e konfirmuar se Vukashinoviq është rrëmbyer nga strukturat e Serbisë, duke u shkelur sovraniteti dhe integriteti territorial i Republikës së Kosovës.
“Z. Vukashinoviq është rrëmbyer nga strukturat e Serbisë si kundërshtar i Listës Serbe. I njëjti, pas plagëve të marra, po trajtohet në spitalin e Nishit në Serbi”, ka deklaruar Sveçla në Facebook.
Ministri ka shtuar se Serbia po dëshmohet çdo ditë e më shumë si shtet agresor ndaj fqinjëve të saj dhe antidemokratik në thelb, pasi që Vukashinoviqit, sipas tij, ende i mohohet mbrojtja ligjore, e cila garantohet edhe në shtetet më autoritare.
“Institucionet tona po vazhdojnë me hetime intensive për zbardhjen e plotë të rastit dhe identifikimin e të gjithë akterëve të përfshirë. Ata do të sillen para përgjegjësisë dhe do të merren masa për t’u kundërvënë sjelljeve kriminale e destruktive të Serbisë ndaj Republikës së Kosovës”, ka theksuar ai.
Në fund, Sveçla ka bërë thirrje ndaj bashkësisë ndërkombëtare që të ushtrojë presion mbi Serbinë dhe të ndërmarrë masa për të ndëshkuar, siç tha ai, “sjelljen destabilizuese dhe kërcënuese për rajonin”.
