Autore: Jona Kelmendi
Në duar mban kontratën që ia ndan rrugën përgjithmonë me gjigantin metarlugjik “Ferronikel” në Drenas pas 39 vitesh punë.
Shaban Arllati që nga viti 1986 ka qenë pjesë e ndërmarrjes Ferronikeli, kompanisë metalurgjike që për dekada ka përpunuar nikelin dhe ka qenë një nga eksportuesit kryesorë të vendit.
Arllati është vetëm njëri nga mbi 300 punëtorët që kompania ka marrë vendim për ta larguar, në përpjekje për të përballuar krizën financiare dhe rritjen e kostove të prodhimit.
“Jam punëtor i “Feronikelit” që nga viti 1986, për momentin i erdh fundi kështu megjithëse nuk e kena prit këtë përfundim se na jemi punëtorë të vjetër këtu mirëpo ja qe i erdhë. Nuk është kon i lehtë tash faktikisht me punu 30 e s’di sa vjet nuk o lehtë po tek e fundit e pranum qa me bo shëndeti është mbi gjitha”, shprehet ai.
Ndër punëtoret e prekur nga ky vendim është edhe Lutfi Halilaj, i cili ka punuar aty për gati 40 vjet.
“Jam kanë normal në punë veç një telefonatë thirrën thanë hajde lajmërohu në drejtori në burime njerëzore, shkova ma dhanë kontratën, po eci prej shpije. Kjo ka ndiku se kur je një punëtor qe 40 vjet punon aty e ke lënë shëndetin e mu qu me ece”, shprehet Halilaj.
Ani pse kontratën me “Feronikelin” e kishte të përhershme, ky vendim i erdhi edhe punëtorit Agim Rroku.
“Sot më kanë informu prej drejtorie që duhet me ardhë me shkëput kontratën e punës edhe pse e kom kontratën e përhershme, pra unë për momentin edhe dy vite e gjysmë jam para pensionit. Realisht i kem 40 vjet gati punë qetu e quam krejt kohën tash shko prej shpije merre kontratën, me tri rroga pagesë ti paguam po kjo nuk është ne rregull”, shprehet ky punëtor.
Në anën tjetër në një përgjigje me shkrim për televizionin, Inspektorati i Punës kanë treguar që kanë pranuar ankesa lidhur me largimet nga puna të punëtorëve nga “Feronikeli”.
“Inspektorati Qendror i Punës është duke e trajtuar rastin sipas procedurave ligjore dhe aktualisht jemi në fazën e shqyrtimit dhe zhvillimit të inspektimit në teren. Pas përfundimit të procedurës së inspektimit dhe nxjerrjes së vendimit nga inspektorët përgjegjës të lëndës, ne do t’ju mbajmë të informuar juve dhe publikun, në përputhje me legjislacionin në fuqi”, thuhet në reagim.
Televizioni ka tentuar gjatë ditës që të kontaktojë me kompaninë në fjalë për të marrë një shpjegim me të gjerë lidhur me këtë vendim por të njëjtit nuk kanë pranuar.
Mirëpo sipas një njoftimi nga kjo ndërmarrje ata kanë thënë që krejt ky vendim ka ardhur si shkak i ndaljes së gjatë të aktiviteteve prodhuese dhe kushteve të vështira të tregut që vazhdojnë të ndikojnë në shitje dhe fitime.
