Prokuroria Speciale ka bërë të ditur se ka nisur hetimet lidhur me rastin ku një zyrtar i Bashkimit Evropian është plagosur në Gjakovë.
Zëdhënësja e Prokurorisë Speciale, Arbnora Luta ka thënë për teve1.info, se ky institucion ka nisur veprimet hetimore në përputhje me Kodin e Procedurës Penale dhe ligjet në fuqi
“Prokuroria Speciale ju njofton se nga momenti kur e ka pranuar rastin në trajtim, ka filluar me ndërmarrjen e veprimeve hetimore në përputhje me Kodin e Procedurës Penale dhe ligjet në fuqi. Në koordinim me njësitë relevante të Policisë së Kosovës, Prokuroria Speciale është duke ndërmarrë të gjitha masat e nevojshme hetimore me qëllim të zbardhjes së plotë të gjendjes faktike. Duke theksuar se rasti është në fazën fillestare të hetimeve, me qëllim të ruajtjes së integritetit të procesit hetimor, në këtë fazë nuk mund të ndajmë më shumë informacione”, tha Luta.
Policia e Kosovës ka njoftuar se një shtetas i huaj ka kërkuar ndihmë mjekësore pasi i njëjti ishte plagosur nga një mjet i mprehtë.
Sipas raportit të Policisë së Kosovës, viktima fillimisht është trajtuar në QKMF në Gjakovë teksa me udhëzim të mjekut kujdestar është dërguar në QKUK.
Ndërsa, nga ShSKUK kanë thënë se gjendja e pacientit momentalisht është stabile.
“Lëndimet janë në kokë në formë të kontuzioneve, dhe një plagë prerëse në regjionin e veshit të majtë, lëndimet në gjoks gjithashtu janë lëndime kontuzive dhe plagë prerëse-shpuese në regjionin pectoris djathtas, fraktura e brinjës së tretë djathtas dhe një pneumothorax minimal i cili është duke u observuar. Gjendja e pacientit momentalisht është stabile dhe është në observim të vazhdueshëm nga stafi. Paraprakisht në Q.E janë konsultuar Kirurgu Vaskular, Ortopedi dhe RL-ja”, kanë thënë për Tëvë1 nga ShSKUK.
“Viktima mashkull shtetas i huaj ka kërkuar ndihmë mjekësore në QKMF Gjakovë, pasi që i njëjti kishte dy plagë të cilat dyshohet se janë shkaktuar nga një mjet i mprehtë. Viktima me udhëzim të mjekut kujdestar është dërguar në QKUK. Rasti është duke u hetuar”, thuhet në raportin e Policisë së Kosovës”, thuhet në njoftim. /teve1.info
