Te premten doli para gazetarëve.
Nga foltorja e presidencës, Vjosa Osmani, propozoi shmangien e një krize pagash për punëtorët e sektorit publik.
Sipas shefes së shtetit, kjo mund të bëhet përmes zgjatjes buxhetore.
“Kërkova një rrugë me dakordim të partive për procedim të buxhetit dhe Planit të Rritjes. Nuk kishte gatishmëri nga një numër i madh për procedim të buxhetit, por unë propozova që të shikojmë mundësi të tjera kushtetuese që është zgjatja buxhetore që së paku deri më 31 mars 2026 qytetarët të mos përballen me situatë ku nuk kanë paga dhe mirëqenie. Kjo çështje nga disa u shqyrtua, do të jem në kontakt me partitë nëse ekziston një mundësi e tillë”, ka deklaruar Osmani.
Osmani deklaroi se mund ta marrë si detyrim dhe të procedojë zgjatjen buxhetore.
Tëvë1 të hënën ka pyetur në Presidencën e Kosovës, nëse Osmani ka filluar me hapat për shmangien e krizës.
Por nga presidenca nuk kanë kthyer përgjigje.
E profesori dhe eksperti i ekonomisë, Remzi Smajli, tregon se çfarë nënkupton zgjatja buxhetore.
“Zgjatja buxhetore nënkupton vetëm shpenzimet për funksionimin minimal të funksioneve të shtetit; të paguhen pagat, pensionet dhe shpenzimet e domosdoshme të shtetit. Nuk ka të drejtë të bëj investime kapitale apo të projektoj investime kapitale të tjera”, ka thënë Smajli.
Sipas Smajlit, Kushtetuta i jep të drejtën Osmanit të angazhohet për funksionimin normal të shtetit.
“Sipas Kushtetutës, neni 97, parashihen që presidentja të bëj propozime, por assesi të miratoj apo propozoj buxhet të ri. 1:11 Në këtë rast, sipas nenit 84 të Kushtetutës që presidentes i jep kompetenca për vazhdimin e funksionimit normal të shtetit, atëherë ajo ka të drejtë që në kuadër, që përveç të mandantojë një kryeministër të ri apo shpalljen e zgjedhjeve të reja, t’i propozoj qeverisë aktuale të vazhdojë me procedurat buxhetore”, është shprehur tutje Smajli.
Ndryshe, të dielën ministri i financave, Hekuran Murati, kërkoi që buxheti i vitit 2026, të votohet para se vendi të shkoj në zgjedhje të reja parlamentare.
