Kandidati i Lëvizjes Vetëvendosje për kryetar të Prizrenit, Artan Abrashi, ka marrë përkrahjen e Zafir Berishës në garën e balotazhit në këtë qytet.
Në balotazhin e 9 nëntorit Abrashi do të jetë përballë kryetarit aktual, Shaqir Totajt të PDK-së.
Totaj ka zyrtarizuar më herët të dielën marrëveshjen me LDK-në.
Zafir Berisha ka deklaruar se koalicioni i tij dhe i Bashkimit Demokratik për mbështetjen e kandidatit Artan Abrashi në balotazh është një përpjekje parimore për të parandaluar që Prizreni të bjerë “në duart e hajdutëve të rinj e të vjetër” nga radhët e PDK-së dhe LDK-së.
Në një përgjigjie për Tëvë1, Berisha theksoi se koalicioni PDK–LDK në Prizren është një marrëveshje “biznesore e jo politike”, e cila, sipas tij, ka për qëllim vetëm interesat e grupeve të caktuara dhe jo të qytetarëve të Prizrenit.
“Koalicioni ynë për mbështetje të Artanit në balotazh është përpjekje parimore e BD-së dhe e imja për të penguar që Prizreni të bjerë në duart e hajdutëve të rinj e të vjetër të PDK-LDK, të cilët kanë bërë koalicion biznesor, jo politik e partiak për Prizrenin,” tha Berisha.
Ai shtoi se e njeh mirë “të dy shkollat politike” dhe se bashkëpunimi i fshehtë mes tyre daton që nga viti 2009.
“I njoh mirë të dy ‘shkollat’ politike të cilat fshehurazi bashkëpunojnë që nga viti 2009 për interesa të njësive parapolitike të këtyre dy partive. Marrëveshja legale, pas 15 vitesh bashkëpunim nën tavolina, duhet të ndalet më 9 nëntor,” tha Berisha.
Balotazhi për Komunën e Prizrenit do të mbahet më 9 nëntor, ku pritet përballja mes kandidatëve kryesorë për kryetar të komunës.
