Lëvizja Vetëvendosje, garon në rundin e dytë të zgjedhjeve lokale në 12 komuna dhe ata e hapën zyrtarisht e hapin fushatën në fundjavë.
I pari i kësaj partie, njëkohësisht, kryeministri në detyrë, Albin Kurti, premtoi investime dhjetëra milionëshe për komunat në të cilat fitojnë kandidatët nga partia e tij.
“Unë nuk e jap buxhetin e shtetit dhe paratë e taksave, për ata kryetarë të cilët nuk dinë të punojnë mirë, apo për ata që vjedhin. Në komuna si Shtimja e si Kamenica, për katër vite kemi çuar investime dhe buxhet aq sa të tjerët as për 20 vjet nuk i kanë çuar. E pra, pse të mos jenë edhe Prishtina, Mitrovica, Prizreni, Gjakova, Peja, Vitia, Kaçaniku, Vushtrria, Fushë Kosova, Obiliqi, Rahoveci njësoj si Podujeva e Gjilani? Pse të mos vijnë edhe te komunat tuaja investime dhjetëramilionëshe?”, është shprehur Kurti.
Ky deklarim nga një shef qeverie në detyrë, po vlerësohet si skandaloz nga analisti i politikave në Institutin “GAP”, Bekim Salihu.
“Ajo çfarë ka deklaruar kryeministri Kurti është skandaloze, për faktin që kryeministri Kurti nuk ka kurrfarë mandati për të bërë vlerësimin e performancës së komunave. Dhe në të njëjtën kohë nuk ka mandat për të konsideruar ose cilësuar ndonjë kryetar aktual të komunës hajn ose mospunëtor. Për shkak se janë mekanizmat dhe kriteret e tjera që bëjnë një konstatim të tillë”, kanë folur nga Instituti GAP.
Këtë qasje të Kurtit me shqetësim e kanë marrë edhe Asociacioni i Komunave.
Sipas tyre, kjo është vazhdimësi e qasjes e cila e ka përcjellur këtë katër vjeçar.
“Janë formulat të cilat i bëjnë ndarjet buxhetore për komunat. Më këto ndarje, kryetarët e deritanishëm kanë qenë jashtëzakonisht të kënaqur, mirëpo nuk kanë qenë të kënaqur aty ku ministritë e linjës kanë përdor kritere politike apo etnike. Dhe ku një komunë e qeverisur nga një parti politike ka përfituar mbi 100 euro për kokë banori, kurse një komunë tjetër e cila nuk ka qenë e qeverisur nga Lëvizja Vetëvendosje, ka përfituar shumë pak”, ka thënë Ibrahimi
Ky deklarim nga ana e Kurtit për mbështetje financiare ndaj komunave, është kritikuar edhe nga partitë e tjera politike.
