Sot shënohet Dita Ndërkombëtare për t’i dhënë fund mosndëshkimit të krimeve kundër gazetarëve, e cila u shpall nga Asambleja e Përgjithshme e Kombeve të Bashkuara përmes Rezolutës A/RES/68/163 në vitin 2013.
Në vitet e kaluara, më shumë se 1,000 gazetarë janë vrarë për raportimin e lajmeve dhe sjelljen e informacionit në publik.
Në nëntë nga dhjetë raste, vrasësit kalojnë të pandëshkuar.
Mosndëshkimi çon në më shumë vrasje dhe shpesh është simptomë e përkeqësimit të konflikteve dhe prishjes së ligjit dhe sistemeve gjyqësore.
UNESCO është e shqetësuar se, pa ndëshkueshmëri, dëmtohen shoqëritë e tëra, duke mbuluar abuzime serioze të të drejtave të njeriut, korrupsionin dhe krimin.
Rezoluta e OKB-së u kërkoi shteteve anëtare të zbatojnë masa të caktuara për të kundërshtuar kulturën e pandëshkueshmërisë.
Kjo rezolutë dënon të gjitha sulmet dhe dhunën ndaj gazetarëve dhe punonjësve të mediave.
Ajo gjithashtu nxit shtetet anëtare të bëjnë çmos për të parandaluar dhunën kundër gazetarëve, për të siguruar përgjegjshmëri, dhe për të sjellë para drejtësisë autorët e krimeve kundër gazetarëve dhe punonjësve të mediave, duke siguruar që viktimat të kenë qasje në mjete të përshtatshme juridike.
Dita Ndërkombëtare për t’i dhënë fund mosndëshkimit të krimeve kundër gazetarëve u zgjodh si datë në përkujtim të vrasjes së dy gazetarëve francezë në Mali, më 2 nëntor 2013.
