U mblodhën në Ohër. Aty nënshkruan disa marrëveshje. Shqipëria, Maqedonia Veriore dhe Serbia po e fuqizojnë nismën “Ballkani i Hapur”. Por Kosova po e kundërshton fuqishëm.
Kryeministri Albin Kurti po vlerëson se nuk mund të ketë “Ballkan të Hapur”, pa trajtim të barabartë dhe pa qenë gjashtë vendet e rajonit. Madje, sipas tij, ky ka qenë edhe mesazhi i të dërguarit të posaçëm të ShBA-së, Gabriel Escobar për Ballkanin Perëndimor.
“Shtetet e Bashkuara të Amerikës e kanë thënë shumë qartë se pa qenë gjashtë shtetet aty, nuk ka themelim të ashtuquajturit ‘Ballkan të Hapur’”, tha Kurti.
Kreu i ekzekutivit në një deklarim për media ka komentuar edhe vizitën e nesërme të kancelarit gjerman, Olaf Scholz në Kosovë, e ku tha se pret një fillim të ri dhe energjik të Procesit të Berlinit.
“Një fillim të ri dhe energjik të Procesit të Berlinit, ku jemi të gjithë të barabartë dhe ku përshpejtohet anëtarësimi i të gjitha vendeve”, shtoi Kurti.
Kurti iu përgjigj edhe presidentit të Serbisë rreth këmbimit të linjitit me energji elektrike serbe.
“Kjo është një përpjekje e presidentit autoritar të Serbisë që të kalojë nga projekti i dështuar i shkëmbimit të territoreve, në këtë të shkëmbimit të qymyrit”, theksoi Kurti.
Kryeministri Kurti foli edhe për protestën e veteranëve dhe rritjen e pagës minimale. Derisa edhe sqaroi se a është veteran i vërtetë i UÇK-së, pas akuzave të opozitës se ai është veteran i rrejshëm.
“Ata meritojnë edhe më shumë se paga minimale, por ajo nuk mund të jetë pagë, pasi e njëjta jepet për punë. Unë kam punuar në zyrën e përfaqësuesit të përgjithshëm të UÇK-së, zotëri Adem Demaçit”, theksoi Kurti.
Këto komenti i pari i Qeverisë i bëri pas dorëzimit të disa medaljeve të njësive speciale të EULEX-it.
