Raportimin për pushim mjekësor, e kërkonin në Qendrën Emergjente.
Por, për të, qytetarëve të Vushtrrisë, iu kërkohej të paguanin.
Mirëpo pagesën nuk e bënin në sportelin e QKMF-së.
Sipas organeve të rendit, mjeku A.V dyshohet se për këtë raport mjekësor, pacientëve iu kërkonte 10 deri në 50 euro.
Drejtoresha e QKMF-së ne Vushtrri, Naile Gjaka, nuk ka qene ne vendin e punës te mërkurën, për t’u prononcuar për këtë rast. Ndërsa përgjigje nuk ka kthyer, as Drejtori i Shëndetësisë në këtë komune, Lorik Maxhuni. Madje ky i fundit, ka fikur edhe telefonin ne momentin kur është kontaktuar nga ekipi i Tëvë1.
E këto veprime të A.V, vunë në lëvizje organet e rendit të martën.
Nën dyshimet për veprat “marrja e ryshfetit” dhe “keqpërdorim i pozitës apo autoritetit zyrtar” A.V përfundoi nën prangat e Policisë së Kosovës.
“Më 28.10.2025 nga njësitë relevante të policisë është arrestuar i dyshuari mashkull kosovar për shkak të dyshimit të bazuar se ka kryer veprat penale të cekura më lart. Dyshohet se i dyshuari qëllim të përfitimit personal për shërbime të ofruara nga pacientët kishte kërkuar dhe pranuar shuma të ndryshme të hollave nga 10 deri 50 euro për t’u lëshuar raporte për pushime mjekësore. I dyshuari pas intervistimit, me vendim të prokurorit është dërguar në mbajtje”, ka njoftuar Policia e Kosovës.
Ndërkohë, nga Prokuroria Themelore e Mitrovicës, bënë me dije se hetimet për këtë rast zgjatën disa muaj.
Ndërsa me vendim të prokurorit, mjekut iu caktua masa e ndalimit prej 48 orëve.
“Prokuroria Themelore në Mitrovicë në koordinim me Policinë e Kosovës, respektivisht Drejtorinë për Hetimin e Krimeve Ekonomike dhe Korrupsionit, pas hetimeve disa mujore dhe pas zbatimit të masave të veçanta hetimore, ka arrestuar një (1) mjek në Vushtrri me iniciale A.V., me dyshimin e bazuar se ka kryer veprën penale “Marrja e ryshfetit”. I njëjti akuzohet se në këmbim të mjeteve monetare ka lëshuar vërtetime të ndryshme mjekësore për qytetarët”, thuhet nga Prokuroria Themelore në Mitrovicë.
Ndryshe, kjo nuk është hera e parë që A.V përfundon në ndalim policor.
Vitin e kaluar, të njëjtin një paciente e kishte denoncuar për ngacmim seksual.
