Ylli Gashi është emri i ri i cili do të dëgjohet shumë në futbollin evropian dhe atë ndërkombëtar. 17-vjeçari po shkëlqen te ekipi i të rinjve të Bayern Munich dhe falë paraqitjeve të tij ka tërhequr vëmendjen e FSHF-së dhe FFK-së.
Të dyja Federatat tashmë janë në ‘luftë” mes tyre për shërbimet e shqiptarit. Sipas “Bild” bëhet me dije se me talentin e Bayern kanë nisur edhe takimet e para. Raportohet se Franco Foda ka pasur një takim me Gashin për ta bindur të veshë fanellën e “Dardanëve”
Por mësohet se nuk ka mbetur pas as Shqipëria dhe Armand Duka ka udhëtuar drejt Munihut për të takuar personalisht 17-vjeçarin dhe familjen e tij, për ta bindur për të përfaqësuar Kombëtaren shqiptare.
“Trajneri i Kosovës, Franco Foda, udhëtoi për në Mynih për bisedime dhe tani dëshiron ta bindë Gashin që të kalojë në ekipin përfaqësues të të rriturve sa më shpejt të jetë e mundur. Kosova, e cila e mposhti dy herë Suedinë në kualifikimet e Kupës së Botës, aktualisht renditet e dyta pas Zvicrës dhe ka gjasa të mira për t’u kualifikuar në Botërorin e vitit 2026.
Edhe Shqipëria e dëshiron Gashin. Presidenti i Federatës Shqiptare të Futbollit, Armand Duka, po ashtu ishte në Munih për bisedime. Që atëherë të dyja federatat kanë qenë në kontakt të vazhdueshëm me Gashin”, shkruhej në artikull.
Tashmë mes dy ekipeve ka nisur një “luftë e ftohtë” për Gashin dhe në javët ose muajt në vazhdim pritet të mësohet më shumë mbi të ardhmen e tij. Siç dihet aktualisht është pjesë e të rinjve të Gjermanisë, teksa herë pas herë stërvitet edhe me Bayern Munich të ekipit A.
