Kuvendi i Kosovës ka nisur seancën e jashtëzakonshme, ku pritet të zgjidhet Qeveria e re e Kosovës.
Mbajtja e seancës vjen pas konstituimit të Kuvendit të Kosovës më 10 tetor, tetë muaj pas mbajtjes së zgjedhjeve parlamentare.
Presidentja e vendit, Vjosa Osmani e ka mandatuar kreun e Lëvizjes Vetëvendosje, Albin Kurti, për postin e kryeministrit.
Megjithatë, mbetet e paqartë nëse në këtë seancë do të ketë votat e mjaftueshme prej 61 për formimin e kabinetit qeveritar.
Lidhja Demokratike e Kosovës, të cilës Kurti i ka bërë ofertë për bashkëqeverisje, ka bërë të qartë se nuk do të hyjë në koalicion me Lëvizjen Vetëvendosje.
Po ashtu, Nisma Socialdemokrate e drejtuar nga Fatmir Limaj, parti e cila kishte zhvilluar negociata me LVV-në për bashkëpunim, ka njoftuar se nuk dëshiron të hyjë në qeverisje me Lëvizjen Vetëvendosje.
Në periudhën kur ishte bllokuar procesi i zgjedhjes së kryetarit të Kuvendit, Nisma kishte thënë se do ta votonte Qeverinë Kurti III, me kushtin që atij t’i takonte posti i kryetarit të Kuvendit.
Por pas zgjedhjes së Dimal Bashës kryetar të legjislativit, partia e Limajt ka deklaruar se nuk do të bashkëpunojë me LVV-në, përderisa Basha e drejton Kuvendin.
Albin Kurti, kryeministër në detyrë, të shtunën nuk i është përgjigjur pyetjeve të gazetarëve për mundësinë e një seance të dielën dhe nëse ka siguruar votat e mjaftueshme.
Kurti kishte thënë vazhdimisht që ka votat për formimin e Qeverisë, derisa Kuvendi nuk ishte i konstituuar.
Megjithatë, javën e kaluar nga Lodra ai e përmendi këtë proces si të vështirë, duke akuzuar opozitën se nuk dëshiron bashkëpunim dhe se ka shumë inate e përçarje.
Ndërkohë, deputetja e Grupit Parlamentar të LVV-së, Mimoza Kusari – Lila, në një intervistë për Tevë1 tha se nuk kanë siguruar votat, por janë duke bërë përpjekje deri në momentin e fundit.
Kurti ka mbështetje nga disa deputetë të komunitetit jo shumicë, përfshirë ata jo-serbë, por ato vota janë të pamjaftueshme për të kaluar pragun e nevojshëm.
Nga ana tjetër, opozita e ka akuzuar Kurtin për tentativën për të “peshkuar” deputetë të saj.
