Deputeti dhe nënkryetari i LDK-së, Lutfi Haziri, ka deklaruar se nuk do të bëjë asnjë kompromis politik që të perceptohet si “shitje e votës” lidhur me formimin e Qeverisë Kurti III.
Ai shtoi se për LDK-në çështja është e mbyllur, duke përjashtuar çdo befasi në qëndrimin e partisë ndaj votimit të qeverisë së re.
“’Qeveri të elefantëve’ nuk ka. Me vetë faktin që kanë arrit me iu afru dhe plotësua kërkesa deputetëve të pakicave joserbe, sepse janë plotësuar kërkesat deri sot – atëherë nuk përjashtohet mundësia që me deputetë të partive tjera me bë qeverinë. Për LDK-në është çështje e mbyllur, mos pritni nuk ka befasi”, deklaroi ai në emisionin “Këndi i Debati” në Tëvë1.
Haziri deklaroi se asnjë parti nuk bënë “vetëvrasje politike” në mënyrë që të votohet qeveria e re.
“Ne jemi të përgjegjshëm, por natyrisht që jo kur të pamundësohet. Jam pamundësuar për ta ushtruar detyrën time. Unë si deputet nuk mundem ta pranoj – nëse kam vullnet politik dhe analizë me votua nesër qeverinë për një arsye sublime, por në momentin që votoj unë nga partia e parë së pari cilësohem si votë e bartur. Në perceptimin publik, çdo votë , çdo racionalitet quhet budallaki sot. Çdo votë me vullnet të mirë, me vullnet sublim për ta ndihmuar quhet shitje e votës. Askush nuk bën vetëvrasje politike për t’i bërë mirë kësaj Republike kur e di që është vetëvrasje politike”, tha ai.
Takimi i Kuvendit të Kosovës, i paraparë për të dielën, pritet të jetë vendimtar për formimin e institucioneve. Deri më tani, Lëvizja Vetëvendosje nuk ka bërë publike ndonjë marrëveshje me partitë tjera, por insistojnë se po punojnë maksimalisht për sigurimin e numrave të nevojshëm për votim. /teve1.info/
