Në Gjykatën Themelore në Prishtinë ka dështuar seanca gjyqësore ndaj ndaj Zoran Kostiq dhe Dragan Miloviq, të akuzuar për krime lufte. Kjo ndodhi me kërkesë të mbrojtjes së të akuzuarit, Zoran Kostiq i cili tha se deklaratën e dëshmitarit që sot ishte paraparë të dëgjohet e kanë pranuar në gjuhën serbe me vonesë. Sipas tij, të njejtën e kanë pranuar vetëm 10 minuta para fillimit të seancës, raporton KosovaPress.
Zoran Kostiq dhe Dragan Miloviq akuzohen se në cilësinë e pjesëtarëve të policisë serbe, në bashkëkryerje me pjesëtarë tjerë të policisë, ushtrisë dhe paramilitarë serbë, kanë kryer krime lufte kundër popullatës civile.
Prokurorja e rastit, Florije Shamolli kërkoi që seanca të vazhdohet me marrjen në pyetje të dëshmitarit, Naim Haliti vetëm nga ana e prokurorit.
Por kjo përsëri u kundërshtua nga avokati i Kostiq, Predrag Milkoviq.
Më pas kryetari i trupit gjykues, Lutfi Shala tha se duke mos dashur t’ia mohojë të drejtën mbrojtjes për një mbrojtje efektive nuk ka kushte për vazhdim të seancës dhe ndërpreu seancën.
Seanca e radhës u caktua të mbahet më 24 nëntor në ora 13:15.
