Vetëm edhe tri ditë i ka afat mandatari i parë për kryeministër, Albin Kurti për formimin e Qeverisë së re.
Mirëpo, pavarësisht se po afrohet 26 tetori, nga Lëvizja Vetëvendosje ende nuk ka ndonjë njoftim publik se me cilat parti politike janë takuar deri më tani.
Përveç 48 deputetëve që Albin Kurti i ka në Kuvendin e Kosovës, përkrahje i kanë dhënë edhe disa nga deputetët e pakicave.
Dritë të gjelbër votimit pro Qeverisë Kurti kanë nënkryetarja e pakicave, Emilja Rexhepi dhe deputeti, Elbert Krasniqi.
“Po, sigurisht që do të votoj për Qeverinë e re Kurti 3”, ka thënë Rexhepi për Tëvë1.
Përkrahjen mandatari Kurti e ka edhe të deputetit të pavarur nga komunitetit jo shumicë, Artan Asllani.
Ai ka treguar se ka pasur disa takime me Kurtin por nuk e ka kushtëzuar për votim.
Votë pro Qeverisë së re kanë edhe nga Partia Rome e Bashkuar e Kosovës.
Deputeti i këtij subjekti, Albert Kinolli ka thënë se as këta nuk kanë kushte por kanë marrëveshje gentlemen-e.
Televizioni ka provuar të marrë një qëndrim edhe nga deputetët e tjerë të pakicave, Duda Balje , Veton Berisha, Rasim Demiri dhe Adem Hoxha, por të njëjtit nuk kanë qenë të qasshëm.
