Një person i moshuar ka humbur jetën të mërkurën në Fushë Kosovë, pasi ka rënë nga lartësia në një pusetë të ashensorit, në një ndërtesë që ndodhet ende në ndërtim e sipër.
Lajmin e ka konfirmuar zëvendëskomandanti i zjarrfikësve, Abdusamed Shkodra, i cili tha se trupi i pajetë u tërhoq nga ekipet e zjarrfikësve dhe iu dorëzua autoriteteve kompetente.
“Në orën 13:47 kemi pranuar një lajm se një person i moshuar ka rënë në një pusetë në një ndërtesë në ndërtim e sipër, pra në hapësirën ku vendoset ashensori. Ka rënë nga lartësia. Zjarrfikësit kanë bërë tërheqjen e trupit të pajetë dhe e kanë dorëzuar te organet kompetente. Ngjarja ka ndodhur në Fushë Kosovë”, ka njoftuar Shkodra.
Sipas tij, nga informacionet e para dyshohet se viktima nuk ishte punëtor në objekt, por një kalimtar i rastit.
Ndërkohë, ngjarja është konfirmuar edhe nga zëdhënësja e Policisë së Kosovës për rajonin e Prishtinës, Flora Ahmeti.
“Sot në stacionin policor të Fushë Kosovës është iniciuar një rast Hetim mbi vdekje. Rasti ka ndodhur në rrugën Agron Rrahmani, ku ka humbur jetën viktima mashkull, 77 vjeç. Rasti është duke u hetuar nga njësitet kompetente në koordinim me prokurorinë”, ka deklaruar Ahmeti.
