Në katër komunat veriore të vendit, fituese e zgjedhjeve të 12 tetorit doli Lista Serbe.
Ajo u premtoi qytetarëve të komunitetit serbë, se me ardhjen e tyre në qeverisjen lokale, do të rikthehet siç kanë thënë “gjendja e mëparshme”.
Por një gjë të tillë kryetarët aktual shqiptarë, thonë se nuk do ta lejojnë.
Kryetari i Zveçanit nga radhët e PDK-së, Ilir Peci thekson se është i gatshëm ta bëjë dorëzim-pranimin tek kryetari i ri nga Lista Serbe, Dragisha Miloviq, por ka një kusht.
“Deri sa ka shkuar gjithçka sipas ligjeve të Republikës së Kosovës, momentin kur epet betimi për kryetarin e ri, e komunës do të thotë unë do jem i gatshëm me ia bë dorëzim-pranimin ngjashëm sikur në të gjitha komunat e Republikës së Kosovës. Dashtë Zoti nëse pranon edhe ai me bë një gjë të tillë, nëse jo atëherë do të shohim se cfarë hapa do të ndërmarrim”, ka thwnw ai.
Në anën tjetër, kryetari i Mitrovicës së veriut, Erden Atiq thotë se Lista Serbe, edhe në këto zgjedhje fitoi me shantazh dhe kërcënime ndaj qytetarëve.
Në këtë komunë ku fitues doli, Milan Radojeviq, Atiq thotë se ata kanë punuar me lista sociale, për çka edhe bënë thirrje për hetim nga organet e rendit.
“ Është shumë brengosëse fakti që Lista Serbe i instrumentalizon qytetarët edhe i shantazhojnë me lista të pagave me lista të ndihmës së asistencës sociale që i marin nga shteti serb. Shpresoj që institucionet tona do të ndërmarrin diçka në këtë drejtim që në mënyrë që qytetarët serbë në të ardhmen të dalin të votojnë pa presion dhe pa ndikim kështu nga Lista Serbe”, shprehet Atiq.
Për punën e tij rreth 3 vjeçare, Atiq thotë se u shërbeu të gjitha komuniteteve, pa dallim.
“Ne jemi munduar me shpërnda buxhetin te investimet kapitale edhe gjithë punën që e kemi bërë jemi munduar në mënyrë të barabartë për të gjithë qytetarët me shpërnda këtë punë. Kjo besoj ka ndikuar në ndryshimin e perceptimit të qytetarëve serbë të kësaj komune në drejtim të institucioneve të Republikës së Kosovës. Kjo e dëshmon rënie e madhe të Listes Serbe për gati 50% në këto zgjedhje lokale në krahasim me zgjedhjet e kaluara”, thotë ai.
Në komunën e Zubin Potokut, kryetar është zgjedhur Milos Peroviq ndërkaq në Leposaviq, Zoran Todiq nga Lista Serbe.
Partitë shqiptare në katër komunat veriore kanë arritur të zënë ulëse në Kuvendet komunale.
