Njohësi i çështjeve të sigurisë, Agim Musliu, ka komentuar përdorimin e BIA-s nga presidenti serb, Aleksandër Vuçiq, si instrument politik për kontroll dhe manipulim, jo vetëm brenda Serbisë, por edhe në rajon.
Musliu kujton se gjatë protestave studentore në Beograd, të cilat sfiduan regjimin e Vuçiqit dhe rrezikonin pushtetin e tij, shërbimi sekret serb u aktivizua për të ndërhyrë në mënyrë të drejtpërdrejtë.
Ai shton se protestat u njollosën me epitete si “revolucioni me ngjyra” dhe fajësime për ndërhyrje të jashtme, duke u përdorur propagandë për të zhvendosur vëmendjen nga kërkesat reale të qytetarëve dhe për të diskredituar lëvizjen studentore.
Sipas Musliut, BIA nuk përdoret vetëm brenda vendit, por edhe për të sajuar incidente ndër-etnike në Kosovë dhe për të destabilizuar rajonin më gjerë.
Ai thekson se instrumentalizimi i shërbimit sekret si mjet i politikës destabilizuese tregon ekstremitetin e masave që Vuçiq është gati të marrë për të ruajtur pushtetin e tij dhe për të penguar çdo sfidë ndaj regjimit.
Musliu bën thirrje që vendet perëndimore të reagojnë me vendosmëri ndaj këtyre veprimeve, duke izoluar dhe sanksionuar Vuçiqin dhe strukturat e tij, për të parandaluar përkeqësimin e situatës dhe destabilizimin e mëtejshëm në Ballkan.
Në përfundim, ai paralajmëron se mungesa e reagimit ndërkombëtar mund të krijojë precedent për përdorimin e shërbimeve sekrete në luftëra speciale dhe manipulim politik jo vetëm brenda një vendi, por edhe në rajon.
“Në këtë inxhiniering kundër qytetarëve të vet Vuçiqi i përdori shumë brutalisht makinacionet e BIA-s. Njejtë sikurse tentuan t’ia ndërrojnë qëllimet dhe kahjen protestës studentore në Beograd, BIA si instrument i politikës destabilizuese të regjimit të Alekdsandër Vuçiqit përdoret edhe për të sajuar incidente ndëretnike në Kosovë, si dhe për të minuar stabilitetin rajonal në përgjithësi. Instrumentalizimi i BIA-s dhe keqpërdorimi i saj politik nga Vuçiqi për luftë speciale kundër qytetarëve të vet dhe destabilizim të rajonit tregon se sa larg mund të shkojë ky diktator në mbrojtje të pushtetit të tij, si dhe sa shpejt duhet të reagojnë vendet perëndimore për ta izoluar dhe sanksionuar përfundimisht atë”, ka shkruar ai në Facebook./teve1.info/
