Ministri në detyrë i Punëve të Brendshme, Xhelal Sveçla, ka deklaruar se Kosova mbështet dhe mbetet një palë aktive në Procesin e Berlinit, duke u angazhuar për bashkëpunim rajonal mbi parimet themelore të respektimit të sovranitetit dhe integritetit territorial të shteteve të Ballkanit Perëndimor.
Këtë deklaratë ai e bëri gjatë takimit të radhës të Ministrave të Brendshëm në kuadër të Procesit të Berlinit, i cili u zhvillua nën udhëheqjen e Shabana Mahmood, Sekretare për Punë të Brendshme e Mbretërisë së Bashkuar.
Gjatë këtij takimi, i cili përfshiu tri sesione, Kosova prezantoi angazhimet e saj në fushën e bashkëpunimit rajonal në sektorin e sigurisë.
“Pavarësisht sfidave, Republika e Kosovës ka shënuar suksese të vazhdueshme në forcimin e bashkëpunimit rajonal, me synim rritjen e nivelit të sigurisë, luftimin e grupeve kriminale dhe parandalimin e krimeve ndërkufitare”, ka shkruar ai në Facebook./teve1.info/
