Disa automjete të Forcës së Sigurisë së Kosovës kanë hyrë gabimisht në territorin e Mitrovicës së Veriut gjatë ditës së enjtes, ku kanë qëndruar për disa minuta, ka bërë të ditur zëvendësdrejtori i Policisë së Kosovës për rajonin e veriut, Veton Elshani.
Sipas raportimeve të mediave serbe dhe videove të siguruar nga Tëvë1, automjetet e FSK-së hynë në Mitrovicën e Veriut në orët e mëngjesit.
Dëshmitarë okularë raportuan për “KoSSev” se automjetet qëndruan aty për rreth dhjetë minuta. Ishin pothuajse dhjetë automjete, përfshirë disa Hummer dhe tre deri në katër kamionë. Fillimisht, qytetarët menduan se ishte KFOR-i.
E zëvendësdrejtori i Policisë së Kosovës për veriun, Veton Elshani, konfirmoi për Tëvë1 se automjetet ishin të FSK-së. Ai shtoi se ata kaluan rreth pesë minuta në një stacion karburanti, ku policia i ka parë dhe i ka pyetur për situatën. Sipas Elshanit, pjesëtarët e FSK-së u përgjigjën se kishin gabuar vendndodhjen dhe menduan se ishin në Mitrovicën e Jugut.
Elshani gjithashtu theksoi se pjesëtarët e FSK-së nuk kishin armë.
