Shkencëtarët në Universitetin e Kembrixhit kanë bërë një përparim që mund të revolucionarizojë energjinë diellore, duke zbuluar një mënyrë të re për ta shndërruar dritën në energji elektrike duke përdorur një material të vetëm e të lehtë, duke i bërë potencialisht panelet diellore më të lira, më efikase dhe më të lehta për t’u prodhuar.
I publikuar nga Science Daily të mërkurën, studimi prezanton një metodë shumë efikase për kapjen e dritës dhe shndërrimin e saj në energji elektrike.
Ky inovacion mund të ndryshojë jo vetëm teknologjinë diellore, por edhe elektronikën, pasi lejon që i gjithë procesi të ndodhë brenda një materiali të vetëm.
Hulumtimi përqendrohet në një material organik të quajtur P3TTM, i cili ka një elektron të vetëm të paçiftuar duke i dhënë atij veti unike.
“Kjo është magjia e vërtetë”, tha Biwen Li, studiuesi kryesor në Laboratorin Cavendish. Në shumicën e materialeve organike, elektronet zakonisht formojnë çifte dhe mbeten të izoluara nga molekulat fqinje.
Kur molekulat P3TTM janë afër njëra-tjetrës, elektronet e tyre të vetme bashkëveprojnë dhe rreshtohen në një model të veçantë.
Drita mund ta bëjë një elektron të kërcejë drejt një molekule aty pranë, duke krijuar ngarkesa që prodhojnë energji elektrike. Një qelizë diellore e hollë P3TTM shndërroi pothuajse çdo grimcë drite në energji elektrike, duke punuar me shumë efikasitet duke përdorur vetëm një material. Energjia e vogël e nevojshme për këtë, e quajtur “Hubbard U”, është kostoja e të paturit të dy elektroneve në një molekulë.
Dr. Petri Murto projektoi molekula që kontrollojnë mënyrën se si ato bashkëveprojnë dhe energjinë e nevojshme për ndarjen e ngarkesës nëpërmjet fizikës Mott-Hubbard. Ky zbulim i madh mund të lejojë që qelizat diellore të bëhen nga një material i vetëm, me kosto të ulët dhe i lehtë.
Zbulimi është historikisht i rëndësishëm, pasi përkon me 120-vjetorin e lindjes së Sir Nevill Mott, puna e të cilit hodhi themelet për fizikën moderne të materies së kondensuar.
