Politologu Albinot Maloku, në emisionin “Këndi i debatit” në Tevë1, ka folur për zgjedhjet lokale të mbajtura më 12 tetor, duke komentuar veçanërisht zhvillimet në komunën e Drenasit.
Maloku tha se mbështetja që Lëvizja Vetëvendosje i dha kandidatit të PDK-së, Ramiz Lladrovci, në këtë komunë, i ka kushtuar kësaj partie dhe ka rezultuar në humbjen e kandidates së saj.
“Lladrovci e mori në qafë Lëvizjen Vetëvendosje në Drenas, dhe u sakrifikua fuqishëm zonja Tërdevci. Vetëvendosja e mbështeti z. Lladrovci, dhe këtë e pa si një të mirëqenë që ia bëri zonjës Tërdevci, në emër të tentimit për ta shpartalluar Partinë Demokratike në Drenas,” u shpreh Maloku.
Sipas tij, përkrahja ndaj Lladrovcit u bë me synimin që të dobësohej PDK në këtë komunë, por rezultati ishte i kundërt.
“Erdhëm në një situatë ku Lladrovci është fitues pa balotazh, ndërsa Vetëvendosja humbi. Tani mbetet të shihet në katër vitet e ardhshme nëse ai do të sjellë rezultate konkrete,” tha më tej Maloku.
Ai përfundoi duke theksuar se zgjedhjet në Drenas treguan një lloj kalkulimi politik të gabuar nga LVV, që nuk e arriti efektin e synuar.
