Sloganin e kishte “ma mirë me Petrit Hajdarin”.
Por, qytetarët e Drenasit, nuk vendosën kështu të dielën.
Kjo meqë, kandidati i PDK-së për kryetar të Drenasit, i mori vetëm 37, 31% të votave sipas rezultateve preliminare të KQZ-së.
E një ditë pas zgjedhjeve, Tëvë1 vizitoi Degën e PDK-së në këtë qytet.
Por, zyrat ishin të mbyllura, ndërsa askush nga dega nuk e komentoi rezultatin e 12 tetorit.
E besimin e qytetarëve për një mandat tjetër si kryetar, e mori sërish Ramiz Lladrovci.
Ky i fundit me listën e pavarur “Për Drenasin Kampion” e përfundoi garën qysh në rundin e parë, me plot 52,31% të votave.
As fituesi i zgjedhjeve, nuk doli të hënën në zyre.
Kjo meqë Ramiz Lladrovci, udhëtoi drejt Suedisë për ta parë nga afër ndeshjen me Kosovën.
Por, një natë më parë, Lladrovci dha deklarata të forta kundër ish-bashkëpartiakëve të tij.
Përfundimin e garës zgjedhore qysh në rundin e parë në Drenas, e quajti befasi Xhavit Drenori nga Iniciativa Green për Drenasin.
Por, rezultatin e mirëpritën ata që kishin drejtë vote ne këtë komunë.
Në garë për të parin e Drenasit, përveç Lladrovcit e Hajdarit, ishin edhe Egzona Tërdevci nga LVV, Gazmend Heta nga LDK, Naim Bazaj nga iniciativa “Për Drenas e Kosovë” si dhe Beqir Kiqina nga AAK.
Kurse komunën tjetër të Drenicës, atë të Skenderajt, e fitoi bindshëm kandidati i PDK-së, Sami Lushtaku, me 83,45% të votave.
