Presidenti francez, Emmanuel Macron u zotua të hënën se ata do të jenë “të përfshirë në çdo fazë” të planit të armëpushimit në Gaza.
“Franca do të jetë e përfshirë në çdo fazë të planit të Trump (armëpushimi në Gaza), së bashku me partnerët arabë që ndihmoi në mobilizimin e tyre”, tha Macron përmes kompanisë amerikane të mediave sociale X.
Ai gjithashtu vuri në dukje se me lirimin e pengjeve, “paqja bëhet e mundur për Izraelin, për Gazën dhe për rajonin”, shkruan Anadolu.
“Dua ta ndaj këtë gëzim, këtë emocion sot si me popullin izraelit ashtu edhe me popullin palestinez, dhe të falënderoj negociatorët që e bënë të mundur këtë: Egjiptin, i cili na pret sot për këtë samit, Shtetet e Bashkuara të Amerikës, Katarin dhe Turqinë, të cilët kanë ndihmuar në ruajtjen e këtyre shkëmbimeve midis qeverisë izraelite dhe Hamasit”, u tha gjithashtu Macron gazetarëve me mbërritjen e tij në Egjipt për Samitin e Paqes në Sharm el-Sheikh për Gazën.
Ai vuri në dukje se samiti shërben si një mënyrë për të përgatitur hapat e mëtejshëm, duke theksuar se përparësia është rifillimi i operacioneve humanitare në Gaza brenda orëve të ardhshme.
Ai njoftoi gjithashtu se Franca do të bashkëorganizojë me Egjiptin një konferencë humanitare për Gazën në javët e ardhshme për të “mundësuar rifillimin e qëndrueshëm të përpjekjeve humanitare dhe rindërtimit”.
“Për çështjet e qeverisjes, ne do të kemi një rol shumë specifik përkrah Autoritetit Palestinez, duke siguruar që ai të ketë pjesën e vet të përgjegjësisë, por edhe që të kryejë reformat e nevojshme për ditën tjetër”, tha gjithashtu Macron, duke riafirmuar se Franca do të luajë një rol në fazën e dytë të planit të armëpushimit.
Ai theksoi gjithashtu se ata do të bashkëpunojnë me SHBA-në dhe vendet e tjera evropiane dhe arabe për të krijuar një kornizë për një forcë ndërkombëtare stabilizimi dhe për të mbështetur kornizën administrative që do të krijohet për Gazën.
“Franca është gati dhe ka filluar tashmë punën e planifikimit. Ne jemi të përgatitur ta bëjmë këtë dhe besoj se roli ynë është shumë legjitim në aspektin e planifikimit, konsolidimit diplomatik dhe trajnimit për vendosjen e forcave”, siguroi Macron.
Krahu ushtarak i Hamasit, Brigadat Al-Qassam, përfundoi të hënën lirimin e 20 pengjeve izraelite të gjallë, sipas një korrespondent të Anadolu-t. Pengjet iu dorëzuan ekipeve të Kryqit të Kuq në dy grupe në Rripin e Gazës.
Lirimi i të burgosurve palestinezë ka filluar gjithashtu, ndërsa autobusët janë larguar nga burgjet izraelite për në Gaza dhe Bregun Perëndimor, sipas Zyrës së Medias për të Burgosurit Palestinezë të hënën.
