Ministri i Financave, Punës dhe Transfereve, Hekuran Murati, ka bërë të ditur se nga ky muaj, pra nga tetori, të gjitha familjet përfituese të asistencës sociale do të marrin 20 për qind më shumë ndihmë financiare.
“Sot kam lajme të mira për familjet që marrin ndihmë sociale. Nga muaji tetor, sociali rritet për 20 për qind më tepër. Lajmi tjetër i mirë është se Qeveria Kurti III është në ardhje, dhe me të kemi përgatitur edhe masa të reja për fëmijët që përfitojnë nga shtesat, si dhe për pensionistët”, tha Murati.
Gjithashtu, ai tha se do të ketë lajme të mira edhe për ata që punojnë në sektorin privat, dhe për të gjithë veteranët e UÇK-së, më nuk do të ketë ndalesë për të punuar në sektorin privat.
“Së shpejti, veteranët e UÇK-së do të kenë mundësi të punojnë në sektorin privat pa pasur më ndalesa për përfitimet e tyre”, deklaroi ai.
