Kryetari i LDK-së, Lumir Abdixhiku ka reaguar pas kërkesës së PDK-së, drejtuar presidentes Shiroka-Pula për kthim në Kuvend të Ligjit për Specialen.
Abdixhiku duke kujtuar kritikat që ju bënë LDK-së që nuk e përkrahi projektligjin, ka shtruar pyetje se “baltën që hodhët mbi LDK-në, ku do ta lini?”.
Ai ka thënë se kjo parti mbajti qëndrimin e vet, sepse siç ka thënë përgjegjësia ndaj Republikës obligon të thuhet ajo që është e drejtë.
“Na fyet, na shpallët tradhtarë, shkuat aq larg sa e paraqitët LDK-në si kundërshtare të UÇK-së. I vendosët edhe emrat tanë përkrah atyre të Listës Serbe, sepse thamë atë që nuk donit ta dëgjonit; të vërtetën. Ky ligj nuk kishte dhe s’do të ketë asnjë efekt juridik!LDK e mbajti qëndrimin e vet, duke e ditur çmimin e sulmeve që do të pasonin. Sepse përgjegjësia ndaj Republikës na obligon ta themi atë që besojmë se është e drejtë, edhe kur është më e lehtë t’i bashkohesh zhurmës. Mbështetësve tanë u themi qëndroni gjithmonë krenarë! Mund të na sulmojnë nga të gjitha anët, por qëndrimet e LDK-së i kanë qëndruar provës së historisë. Do t’i qëndrojnë sërish! Sepse ato nuk përcaktohen nga vërshimet e momentit, por nga bindjet mbi Republikën. Veç duhet kohë”, ka shkruar Abdixhiku në Facebook.
Ai ka thënë se Lufta e UÇK-së është e shenjtë dhe se duhet mbrojtur në mënyrën e duhur.
“Ajo mbrohet me punë e me mend. Jo kështu”, ka shkruar Abdixhiku.
Grupi Parlamentar i PDK-së ka kërkuar sot nga presidentja e vendit që Ligji për Specialen të kthehet në Kuvend i miratuar më 6 tetor në lexim të dytë.
PDK vet kishte iniciuar ndryshimin e Ligjit për Dhomat e Specializuara. Ky ligj ishte përkrahur nga LVV, ndonëse zyrtarë të kësaj partie kishin shprehur dyshime për përmbajtjen e ligjit duke kërkuar që ai të shqyrtohet me kujdes. Por ligji u miratuar në ditën e fundit të afatit për zgjedhjen e presidentes, ku në të njëjtën seancë Justina Shiroka-Pula u zgjidh presidente.
Aleanca poashtu kishte mbështetur ligjin.
Ndërsa në Kosovë për 21 ditë u protestuar ku u kërkau miratimi i këtij ligji.
Bashkimi Evropian kishte reaguar ashpër pas miratimit të ligjit, duke theksuar se zabtimi i tij do të shënonte regres për Kosovën në rrugën drejt anëtarësimin në BE.
PDK-ja i kërkon presidentes rikthimin në Kuvend të Ligjit për Specialen
