Akuzohet se orkestroi vrasjen e bashkëshortes së tij.
Personi i parë që ka kontaktuar Naim Murselin pas ngjarjes tragjike, të premten erdhi për të dëshmuar.
Valon Lluka që ishte edhe koleg i punës i Naimit, tha para Gjykatës se Murseli e kishte thirrur e shkruar disa herë nga numra të ndryshëm në natën kritike.
Lluka potencoi se kishte shkuar tek vendi i ngjarjes e më pas edhe në stacionin policor, ku ishin Murseli bashkë me fëmijët e tij.
Ndaj këtij dëshmitari, pyetje pati vëllau i Liridona Ademaj.
Pyetje ndaj Llukës pati edhe Naim Murseli, për raportin e tij me Liridona Ademaj.
Në gjyq dëshmoi edhe personi i cili ia dha veturën me qira Granit Plavës, e cila dyshohet se është përdorur nga i njëjti për kryerjen e aktit të vrasjes.
Dëshmitari Aurel Pajaziti, tregon se një veturë, Plava ia kishte marrë me qira dy herë brenda pak ditësh.
Sipas dëshmitarit, për herën e dytë, Plava kishte shkuar me një person tjetër me një veturë të tipit “RangeRover”, por që nuk e kishte njohur.
Identifikimin e tij, nuk e bëri as në sallën e gjyqit.
Para trupit gjykues dëshmoi edhe një bashkëfshatar me Murselin, Plavën e Kokallën, i cili tregoi se në lokalin e tij, klientë të rregullt ishin Kokalla e Plava, por jo edhe Murseli.
Megjithatë, ai përmendi një ditë kur që të tre ishin në lokal në të njëjtën kohë.
Në këtë seancë ishte planifikuar të dëgjohej edhe babai i Naim Murselit, Shaban Murseli, por që i njëjti nuk u paraqit.
Ai paraprakisht i kishte thënë gjykatës se mbetet para deklarimit të tij në polici.
Pozitivisht thirrjes për të dëshmuar, iu përgjigj vëllau i Kushtrim Kokallës.
Kanun Kokalla kërkoi që ta përshëndes vëllaun e tij, Kushtrimin, por një gjë e tillë nuk iu lejua nga trupi gjykues.
